Нянгийн синдром илэрсэн үү?

Байнга хувьсан өөрчлөгдөж байгаа өнөөгийн нийгэмд та өөрөө ч бас өөрчлөгдөж анагаахын зарим талын мэдлэгийг олж авах хэрэгтэй гэж бодогдохгүй байна уу. Эргэн тойронд байгаа боломжуудаа ашигла. Мэдлэгийг олж ав. Ингэсэн тохиолдолд та хүмүүний амьдралд тохиолдож болох ихэнх өвчнөөс сэргийлж, зайлсхийх боломжтой. Эргээд сэдэв ороход мэдээж нянгийн синдром гэж ойлголт одоогоор сонсоогүй л байна. Гэхдээ та бидний бие махбодод ашигтай нян гэж байдаг бөгөөд анагаах ухаанд пробиотик гэж нэрлэдэг. Пробиотикүүд хүний гэдсэнд тэр дундаа бүдүүн гэдсэнд их байрлах бөгөөд хүний биед дараах нөлөөг үзүүлнэ:

• Үрэвслийн эсрэг нөлөө. Ялангуяа гэдэсний үрэвслээс хамгаалах, суулгалт өвчнөөс сэргийлэх нөлөө.
• Дархлааны үйл ажиллагааг идэвхжүүлэх
• Витамин К болон зарим В бүлгийн витамины нийлэгжилтэнд оролцох
• Гэдэсний хэвийн бичил орчинг тэнцвэржүүлэх
• Кальци, магни, төмрийн шимэгдэлтийг түргэсгэх
• Хоол боловсруулах замыг ашиггүй нянгийн нөлөөллөөс хамгаалах нөлөө үзүүлнэ.

Ашигтай нян багасаж болох уу?

• Хоол хүнсэндээ нүүрс ус ихээр хэрэглэдэг таргалалттай хүмүүс
• Агаар, ус, хөрсний бохирдол ихтэй газар амьдардаг хүмүүс
• Удаан хугацаагаар антибиотик эмчилгээ хийлгэсэн хүмүүс
• Суулгалт өвчний дараа ашигтай нян багассан байдаг.

Анагаах ухаанд ашигтай нян багасаж, ашиггүй нян ихсэхийг дисбактериоз гэж нэрлэдэг. Ашигтай нян багассанаар чихрийн шижин, цагаан мөгөөрсөн хоолойн багтраа, харшил, бүдүүн гэдэсний үрэвсэлт өвчин, хавдар, таргалалт гэх мэт олон өвчний шалтгаан болдог байна.

Ашигтай нянгийн тоо хэмжээг яаж хэвийн байлгах вэ?

• Пребиотик хэрэглэх. Пребиотик нь хүнсний эслэгийн агууламж ихтэй хүнсний бүтээгдэхүүн юм. Пребиотик нь ашигтай нянгийн өсөлтийг нь дэмждэг хоол хүнс нь юм. Та өмнөх хүнсний эслэг гэсэн зөвлөмжийг санаж байгаа байх. Ямар хүнсэнд их хэмжээгээр агуулагддагийг өмнөх зөвлөмжөөс хараарай. Мөн сүүлийн үед үр тарианы хальсыг дангаар ялгаж гаргаж авсан нэмэлт бүтээгдэхүүнүүд их байдаг.
• Пробиотик буюу ашигтай нян агуулсан хүнсний бүтэгдэхүүн хэрэглэх. Пробиотик нь сүү, сүүн бүтээгдэхүүн, тараг, бяслаг, кимчи, даршилсан ногоонуудад ихээр агуулагддаг.
• Пробиотик бэлдмэл хэрэглэх. Сүүлийн үед манайд bioGaia, лакторан, probiotic гэх мэт бэлдмэлүүд байдаг.
• Пребиотик болон пробиотик агуулсан хүнсний бүтээгдэхүүнийг түлхүү хэрэглэх хэрэгтэй ба пробиотик бэлдмэлийг зөвхөн эмчийн заавраар хэрэглэх хэрэгтэйг санаарай. Дур мэдэн их хэмжээгээр хэрэглэвэл таны хэрэглэсэн бэлдмэл дэх ашигтай нян таны биед агуулагдах ашигтай нянгийн өсөлтийг дарангуйлж болохыг санаарай.