Шамбарам өвчний талаар та хэр сайн мэдэх бэ?

Орчин цагт та өглөө эртлэн босоод өглөөний цайндаа түргэн хоол (гамбургер, сэндвич) идэнгээ аяга кофе ууж, ажил руу яаран сандран ирж, өдөржингөө 8 цагийг сандал дээрээ сууж өнгөрөөдөг үү. Мөн бидний олонх нь өдөр бүр дасгал хийхэд эсвэл оройн зугаалганд цаг гаргадаггүй. Хөдөлгөөнгүй амьдралын хэв маяг, эрүүл бус хооллолт, биеийн жингийн илүүдэл зэрэг нь олон хүнийг шамбарам гэдэг эмзэг асуудалтай болгоход хүргэдэг. Шамбарам өвчний үед цагаан мах гарах, загатнах, хавагнах, цус гарах, өвдөх зэрэг тааламжгүй шинж илэрч өвчтөн амьдралын бүх баяр баясгаланг мартахад хүргэдэг.

Шамбарам өвчний талаар:

Шамбарам гэдэг нь шулуун гэдэсний (хоол боловсруулах замын төгсгөл буюу өтгөн хэлбэржиж, гадагшлах хэсэг) амсрын судаснууд өргөсөж, цүлхэн үүссэнээр илэрдэг өвчин юм. Үүссэн цүлхэн шулуун гэдэсний салстыг түрж шамбарамын зангилааг бий болгодог.

Шамбарам өвчнийг үүсгэх шалтгаанууд:

• Өтгөн хатах, олон дахин гүйлгэх (орчин үед охид бүсгүйчүүдийн турах зорилгоор хэрэглэж буй бүтээгдэхүүнүүд эмгэг суулгалтыг ихээр үүсгэж байна.),
• Архи, спиртийн төрлийн бүтээгдэхүүн их хэрэглэх
• Ядрах, нойргүйдэл. Энэ үед булчин суларч шамбарамын зангилаа үүснэ.
• Хүнд зүйл өргөх, удаан хугацаагаар суух зэргийн улмаас хэвлийн дотоод даралт ихэсч шамбарам өвчин үүсэх шалтгаан болно.
• Эмэгтэйчүүдийн хувьд жирэмслэлт болон төрөлт нь шамбарам өвчийг үүсгэх шалтгааны ихэнх хувийг эзэлдэг байна.

Эмчинй зөвөлгөө.

• Ихэнх өвчний суурь шалтгаан нь амьдралын буруу хэв маяг байдгийг санах хэрэгтэй. Танд дээрх амьдралын буруу хэв маяг байгаа юм биш биз?
• Та өглөө ажилдаа өлөн явдаг бол заавал өглөөний цайндаа бага зэрэг өөх тостой хол (жишээ нь: цөцгийн тос) хэрэглэж хэвшээрэй. Шөнөжингөө тунарсан цөс ялгарч гэдэсний үйл ажиллагааг идэвхжүүлснээр шамбарамаас сэргийлнэ.
• Удаан хугацаагаар ширээний ард суудаг, жолоо барьдаг, хүнд юм өргөдөг зэрэг ажил эрхэлдэг бол ажиллаж байгаа үедээ 2 цаг тутамд 5 минут амрах, хөнгөн биеийн тамирын дасгал хийх нь шамбарамаас гадна хөдөлгөөний дутагдлаас үүсэх бүх өвчнөөс сэргийлдэг.
• Өтгөн хаталт ихэнхдээ хоолны дэгдлэм болон эмээр эмчлэгдэх бүрэн боломтой. Өтгөн хатах зовиуртай хүмүүс хүнсэндээ аль болох ногоо, жимсийг хэрэглэх нь зүйтэй. Мөн эслэг ихтэй хүнс болон өөх тос хэрэглэх хэрэгтэй. Эдгээр нь бүдүүн гэдэсний гүрвэлзэх хөдөлгөөнийг ихэсгэснээр өтгөн хаталтаас сэргийлэх боломж олгоно.
• Архи, согтууруулах ундааны хэрэглээг хязгаарлах.
• Шамбарам өвчнийг шинж тэмдэг танд байгаа бол мэргэжлийн эмчид хандахыг зөвлөж байна. Эмч таны өвчний үе шатыг тогтоож, 1, 2-р үе шатанд эмээр эмчлэх ба 3, 4-р үе шатанд мэс заслын эмчилгээ хийж өгнө.

Эмч: Б. Нурбол